مشكلتي انا

[center]بسم الله الرحمن الرحيم

بداية احب اقول كم انا اسفة على الموقف اللي حطيت فيه هلي وعلى الثقة اللي بسببها ضيعت فيها كل غالي ..
ما بجذب وبقول نادمة على اللي سويته , لكن صج نادمة لاني سمحت لنفسي امشي فجذي طريج وانا اكثر وحدة تعرف
اشقد اهو واطي ومنحط ..
كان عمري 23 سنة لما بدت الخلافات بيني وهلي كل شي كان ممنوع , الصلاة & القرآن & الاناشيد وحتى الدراسة ,
ناهيكم عن الامور البسيطة مثل اكلم رفيجاتي والطلعات وحتى التلفزيون كان ممنوع عليا فاشياء كثيرة ..
قمت اعاند في كل شي الممنوع عندهم مرغوب عندي والمرغوب عندهم احرمه علي , كنت يوميا اتضارب وياهم وما يمر
يوم من غير صدعة راس . وشوي شوي رجعت اسمع اغاني بعد ما كنت هاجرتنها من اكثر من اربع سنوات وعلى العيد الكبير سرقت تلفون وكلمت رفيجاتي , ووحدة منهم كان بسوابق كنت اسمع مغامراتها واستانس ليما هفتني نفسي
وضربت رقم غريب ورد عليا واحد وبدت بينا سوالف وضحكات ومكالمات مب يومية وبس , كانت كل ساعة اعرف فيها
اهو شو يسوي واعطيه تقرير عني فالساعة اللي عدت , بعدها باسبوعين طلب مني انه يشوفني وطبعا ما وافقت
لكن اهو قاطني وما يرد على اتصالاتي وطرشلي مسج ان كل اللي بينا انتهى , ما بخبركم كيف كانت صدمتي .
المهم بعدها اغلقت التلفون ورجعته لكني ما قدرت انسى ورجعت خذت التلفون وحاولت اكلمة يمكن يلين قلبه لكني انصدمت
لما قالي انه ما يبي يكلم وحدة رخصت باهلها علشان واحد , ما ادري شلي صارلي جني حبيت انتقم , قمت اتصل ارقام
واكلم شباب وامنيهم واوعدهم باللي يبونه ليما امل منهم واقاطعهم ( بس الله شاهد اني ما طلعت مع اي واحد فيهم )
وكنت استانس لما اشوفهم يرجعون يتصلون فيني لشهر واكثر وانا ما ارد عليهم جنة قلبي يرتاح لما اشوف المذلة
اللي يحطون انفسهم فيها . بعد اربع شهور على هذه الحالة وكالعادة طلبت رقم ورد عليا واحد مثل كل مرة بس كان اسلوبه
غير عنهم واهتماماته بعد غير عنهم .
اتضحلي انه مطوع وكان دايما ينصحني اني اودر هالطريج وبعد كان يدزلي مسجات احاديث واحيانا آيات من القرآن
ودايما يخبرني قصص بعبرة وكان يساعدني على مشكلاتي ويا هلي ويقولي كيف اتعامل معاهم ليما علاقتي فيهم تحسنت
وايد , وعلمني كيف ارقي نفسي واقرأ على الماي آيات اهو علمني اياها حتى الكل لاحظ معاملة الوالدة لي وكيف كانت
تفضلني على باجي اخواني واهي اللي كانت تكرهني وما تكلمني نهائيا . حالتي وايد تحسنت وامنت انه في يوم مستحيل
ياذيني , خبرته كل شي عني وعن هلي ووين اسكن حتى الشباب اللي كنت اكلمهم كان يعرف ارقامهم واسمائهم
ومنعني اني ارد على اي رقم غريب ( لحضة ما قلت لكم نبذة عنه اهو مثل ما قلت مطوع اكبر مني بسنة ويدرس الشريعة
وكانت آخر سنة له فجامعة الشريعة غير انه كان ماسك شغل ابوه ) اوكي وين وصلنا , كان يسأل عني باستمرار
ويسألني ان كنت محتاجة شي او متضايجة من شي وبعد يسألني عن هلي وعن اخبارهم , بعد اكثر من شهر زادت العلاقة امبينا ومر صوب بيتنا وقالي اشوفه ومب لازم اهو يشوفني وشفته , واحد بعرض وطول وبلحية كبيرة وبعدها راح بدون ما
يشوفني وسألني رايي فيه لانه يبي يتزوجني ورديت عليه حتى لو ما شفته بعد ابيه ... هني بدت المشكلة ...
وعدني انه يخلص الكورس الاخير ويتجدملي ووافقت , بعدها صارحني انه متزوج وعنده عيال وسالني ان كنت اوافق
اني اكون الثانية ولاني كنت احبه ما قدرت اقول لا ,مرت فترة وزادت الخلافات امبينا على اسباب جدا تافهة واحيانا ليومين
ما يرد على مكالماتي واذا ما اتصلت فيه يتصل اهو فيني ويهزبني لاني ما اهتم فيه وما اراعي الحالة اللي اهو فيها
( كان في فترة امتحانات وبنته مريضة في المستشفى ) بعدها عرفني على حرمته وتصاحبت انا وياها طبعا ماتدري
مرته اني افكر في ريلها وانه يبيني , المهم بعد الخلافات ما كثرت امبينا وعلى الضغط اللي اهو فيه ركب سيارته
وجاني لبيتي وقالي يبي يشوفني لخمس دقايق رحت له وقعدت معاه فالسيارة لخمس دقايق بالضبط ورجعت البيت
صفينا الامور فيها بعدها بيومين او ثلاث تلاقينا مرة ثانية ولفترة اطول وبعدها باسبوع بعد تلاقينا ( للامانة اهو طلب
يشوفني في المرة الثانية لكن المرة الاخيرة انا اللي طلبته ) نسيت اقولكم ان المرة الاخيرة اخوي شافني وانا راجعة البيت
واستوت مشكلة وكان اخوي يراقبني وبعد اخوي الكبير كان متابع وياي احوالي لانه لاحظ ان تصرفاتي متغيرة
واشياء غريبة اسويها , قررنا انا وحبيبي ان نهدي الامور امبينا ليما يهدى الوضع ويكون اهو خلص دراسته وبنته
تتحسن حالتها وفجأة قاطعني بدون سبب وانا اتصل فيه وما يرد عليا , هني حرمته عرفت كل شي بينا مدري شلون
ولكنها كانت تتصل فيني واهي تصيح ولاني حبيتها صج قلتلها اني بنسحب من حياتهم خصوصا انه ما يرد عليا
ولما عرف اهو اللي اتصل فيني ورجع يكلمني بصراحة اسلوبه كان يخليني اسمع كل كلامه حتى لو كان اهو الغلطان
وكالعادة بعد اقل من اسبوع رجع قاطني وما يرد على اتصالاتي بس هذا كانت الاخيرة لانه اخوي نفسه اللي شكني وانا
راجعة البيت شك عندي التلفون وكانت المصيبة اللي وراها الفايدة اخوي الكبير خذني عنده اسكن وياه ومرته
وقالي بينسى كل اللي سويته بس اوعده اني انسى وما اعيدها مرة ثانية , وصج كان يعاملني وايد اوكي وتغيرت انا
وغيرت من اسلوبي وتعدلت حياتي بس اللي كان مضايجني اني بين فترة وفترة افكر فيه .
وافكر اهو صج كان يحبني ولا استغلني بس بطريقة غير عن اللي يستغل فيها الشباب للبنات باسم الحب والزواج
من قلبي اقول الله يسامحك ان كان من البداية قصده يستغلني انا نسيتك قبل لنساك وحتى خفوقي اليوم هدك ...
[/center]

هالله هالله فالردود

يسلمووو خيووو ع القصهـ ...ونتريا اليديد...^^

يسلمووو ع المروور

ثااانكس ع القصه ما شالله عليك ذوييق ف اختيار القصص ..

و انشالله عسوولاتنا ياخذون العبرة من قصة هاي البنت .. ويستفاادون انشالله ..

و السمووووووحهـ ...

كك
العفوو خيتوو

ان شااء الله
سلمتي ع الرد الحلووو

يسلموووووووووووو ع القصه الجميـــلهــ ..

ثااااانكس ..

يسلمووووو خيوو ع القصهـ
ونترياا الزووووووود منكـ

سلمتي ع الرد الحلووو

مشكورين عالقصص الغاوية والقوية

تسلمين ع المروور

تسلـم خيؤؤ ع الـقصـه النـآيـس ,,
نتريآآ الزؤؤد من جدآكـ ..

يسلموو ع المرور